آمریکا قلم درنگی اؤدولو حبسده اولان ژورنالیست نرگس محمدی‌یه وئریلیب
آمریکا قلم درنیی بازار ائرته‌سی، ۲۵ اردیبهشتده بو ایلکی یازی آزادلیغی اؤدولونو ایراندا حبسده اولان ژورنالیست و اینسان حاقلاری ساوونوجوسو نرگس محمدی‌یه وئره‌جه‌یینی آچیقلاییب.
آسوشیتدپرسین خبرینه گؤره، آمریکا قلم درنیی اؤز آچیقلاماسیندا یازیب کی، سون اوتوز ایل ایچینده یازیلارینا و اینسان حاقلاری فعالیتلرینه گؤره ایران حؤکومتی طرفیندن هدف آلینان نرگس محمدی حاضردا اونا قارشی ساختا تبلیغات اتهاملاری ایله حبسده‌دیر.
آمریکا قلم درنیی‌نین ایجراچی مودیری سوزان نوسل دئییب: نرگس محمدی ایران حؤکومتی‌نین اونو سوسماغا مجبور ائتمک کامپانییاسینا قارشی جسارتی و سارسیلماز مقاومتی ایله بوتون دونیا اوچون ایلهام قایناغیدیر.
خانیم سوزان نوسل آرتیریب کی، ژورنالیستلر اوچون ان چتین اؤلکه‌لردن بیرینده چالیشان نرگس محمدی بوتون دونیادا یازیچیلار، ژورنالیستلر و صنعتچیلر اوچون ایفاده آزادلیغی‌نین اومیدی و اؤنجوسودور.
بو اؤدولو اونون آدینا نرگس محمدی‌نین حیات یولداشی، ژورنالیست تقی رحمانی آلاجاق.
آمریکا قلم درنیی اؤز آچیقلاماسیندا بیلدیریب کی، نرگس محمدی سون ۲۰ ایلده قادینلارین، سیاسی محبوسلارین و آزلیقلارین حوقوقلارینی ساوونور و ایلک دفعه اؤیرنجیلیک ایللرینده قادین حوقوقلاری ایله باغلی مقاله یازدیغینا و اولوسلارآراسی کونفرانسدا ایشتیراک ائتدیگینه گؤره حبس ائدیلیب.
آمریکا قلم درنیی‌نین وئردیگی بیلگیلره گؤره، خانیم محمدی کیتاب یازماقلا، مئدیایا موصاحیبه‌لر وئرمکله و سوسیال شبکه‌لرده‌کی فعالیتلرله اینسان حاقلاری‌نین وضعيتینه و محبوسلارین حوقوقلاری‌نین پوزولماسینا قلوبال دقت چکیب.
۵۱ یاشلی نرگس محمدی اوزون مدت حبسده اولدوغو مدتده ایشگنجه‌لر و تک‌آداملیق هوجره‌لر دا داخیل اولماقلا آغیر جزالارا معروض قالیب.
بو حوقوق ساوونوجوسو اؤتن ایل ۳۰ آی حبس جزاسی، ۸۰ شاللاق ضربه‌‌‌سی و جریمه اؤده‌دیکدن سونرا یئنیدن حبس ائدیلیب.
بو ایل ۱۲ اردیبهشتده نرگس محمدی حبسده اولان باشقا ایکی ژورنالیست نیلوفر حامدی و الهه محمدی ایله بیرلیکده یونسکونون دونیا مطبوعات آزادلیغی اؤدولونو قازانیب.
#محبوسلار #نرگس_محمدی
