میللی کیتاب‌خانادا مجبوری حیجابا قارشی آکسیا کئچیریلیب
ایران‌وایرین آلدیغی بیلگیلره گؤره، ۱۷ فروردین جومه آخشامی گونو میلی کیتاب‌خانانین بیر قروپ عضوو مجبوری حجابا و بعضی عضولرین حجابا گؤره فعالیتی‌نین دایاندیرماسینا اعتراض اولاراق کیتاب‌خانانین اراضیسینده آکسییا کئچیریبلر.
آکسییاچیلار اللرینده اعتراض پلاکاتلاری توتارکن شوعارلار دا سسلندیریبلر؛ او جومله‌‌‌دن حجابسیز، آزادلیق و برابرلیک، هر بیر اینسان اوزاقلاشدیریلیرسا، مین نفر دستکله‌یه‌جک، ارکک و قادین مجبوری حجابا قارشی بیرلیکده دایاناجاق، قادین، یاشام، آزادلیق، آزادلیق بیزیم حاقیمیزدیر، گوجوموز بیرلیکده اولماقدیر، ایشسیزلیک، مجبوری امک، قادینلار اوجون مجبوری حجاب، دوشونمه‌یین کی ساده‌جه ایندی بورداییق بیز هئر گون بورادا اولاجاییق. قورخمایین، قورخماین بیز بیرلکیده‌ییک.
آیریجا میلی کیتاب‌خانانین بعضی ارکک عضولری قادینلارلا بیرلیکده اولاراق، بو اعتراض آکسیاسی سیراسیندا باش اؤرتوسو تاخاراق، نهایت، باش اؤرتولرینی اورادکی حووضا آتیبلار.
بیر مدت آشنجه میلّی کیتاب‌خانانین ۹۰۰ عضوو حجابا گؤره بعضی عضولرین عضولوکلری‌نین دایاندیریلماسینا اعتراض اولاراق قوروم رئیسینه مکتوب یازیبلار. آما ایندییه‌دک نینکی اونلاردان جاواب آلا بیلمه‌ییبلر، حتی میلی کیتاب‌خانانین بیر سیرا باشقا عضولری ده ایشلریندن اوزاقلاشدیریلیب.
#عومومی_اعتراضلار #قادینلار #مجبوری_حجاب
