«ربابه مراداووانین» ۹۰ ایللییی مناسبتی ایله کوچورن:«ویدا حشمتی» حاضیرلایان:«ادبیات سئونلر»
اونون ماهنی‌لاری هئچ واقت اونودولمایاجاق. جنوب حسرتینی دایم اؤزوندن گزدیرن ربابه مراداووا سسینده‌کی نیسگیلی و کدری آصلا گیزله‌ده بیلمیردی. چونکی ایکییه بؤلونموش آذربایجانین طالعینی اؤزونده داشیمیشدی. جنوب‌دا دوغولوب شمال‌دا یاشامیشدی. ۵۰ یاشیندا شمال‌دا دا حیاتلا وداعلاشدی.
«ادبیات و اینجه صنعت» پورتالی خبر وئریر کی، مارتین ۲۲-سینده گؤرکملی مغنّی، خالق آرتیستی ربابه مراداووانین ۹۰ ایللییی‌دیر.
ربابه مراداووا ۱۹۳۳-جو ایل مارتین ۲۲–سینده گونئی آذربایجانین اردبیل شهرینده آنادان اولوب. سونرا عاییله سووئت آذربایجانینا کؤچوب. گنج ربابه صابیر آباد دولت درام تئاتریندا ایشله‌ییب. آکتور «علی اصغر علی اکبر اوو» اونو تصادفاً همین تئاتردا گؤروب و باکی‌یا فیلارمونییادا ایشله‌مه‌یه دعوت ائدیب. او دؤنمده ربابه موسیقی تحصیلی ده آلیب. «آصف زیناللی» آدیندا باکی موسیقی مکتبینده «سیّد شوشینئسکی»نین صینیفینده تحصیل آلماقلا، تئزلیکله ۱۹۵۴-جو ایلدن تا کی عمرونون سونونا کیمی آذربایجان دولت اوپرا و بالئت تئاتری‌نین سولیستی اولوب. تمامی ایله فرقلی و گوجلو سسه صاحب اولان بو خانیمین استعدادی اونا دولت اوپرا و بالئت تئاتری‌نین سولیستی اولدوغو ایللرده مختلف روللار اویناماغا امکان وئریب. «لیلی و مجنون»دا لیلی، «اصلی و کرم»ده اصلی، «شاه اسماعیل »ده عرب‌زنگی، «آشیق غریب»ده شاه‌صنم، «کور اوغلو»دا خواننده قیز، گلین قایاسی»ندا صنم کیمی روللار اوینایان ربابه مراداووا خالقین سئوگی‌سینی قازانیب.
ربابه مراداووا ۱۹۸۳-جو ایل اگوست‌ون ۲۸-ینده جمعی ۵۰ یاشیندا دونیاسینی دییشیب. روحو شاد اولسون!
اونون ان اونودولماز ماهنی‌سینی بو گون دینله‌یک‌می؟
آیری دوشدوک، آیلار اؤتدو، ایل اولدو،
عشقیم سنسیز بیر چاغلایان سئل اولدو.
باغچا سالدیم، چیچک آچدی، گول اولدو،
نئیچون سنی بس اونودا بیلمیرم؟
اونودا بیلمیرم…
مین رنگ وئریر باهار هر بیر چیچه‌یه،
روح گتیریر هر قلبه، هر اوره‌یه.
من چاتیرام مین آرزویا، دیله‌ه،
نئیچون سنی بس اونودا بیلمیرم؟
اونودا بیلمیرم…
دئییرلر کی، یوخدور سئوگی، محبت،
بیر-بیرینه قیز-اوغلان ائدیر عادت.
دوغرودان دا، یوخدور اگر محبت،
نئیچون سنی بس اونودا بیلمیرم؟
اونودا بیلمیرم…
بلی، ربابه خانیمین بو ماهنی‌سینی هئچ واقت اونوتمایاجاغیق، دؤنه-دؤنه دینله‌یه‌جه‌ییک. چونکی اونوتماق ممکن ده دییل.
