چوخ تاسفله آذربایجانین گؤرکملی شاعر، ژورنالیست و فولکلور تدقیقچیسی «سوسن نواده رضی» اسفند آیی‌نین ۲۵نجی گونو بیر مدت کانسر خسته‌لییینه توتولدوقدان سونرا، ۶۰ یاشیندا تبریز شهرینده ابدیلیک حیاتا گؤز یومدو.
سوسن خانیم نواده رضی ادبیاتیمیزا آلتمیشینجی ایللرین ایکینجی یاریسیندان شعرله گلمیش، ایلک اثرلری اوستاد یحیی شیدانین نشر ائتدییی «آذری صحیفه‌سی»نده یاییلمیش و کئچمیش ۳۵ ایل بویونجا متمادی اولاراق ادبی فعالیتلرله مشغول اولان صنعتکاریمیزدان ایدی. بیر نئچه ایل «ائل بیلیمی موسسه‌سی»نین اداره هئیتی‌نین رئیسی و بو موسسه‌نین فولکلور زمینینده آپاردیغی ده‌یرلی تدقیقلرینده باشقا امکداشلاری ایله یاخیندان ایش‌بیرلییی آپارمیشدیر. سوسن خانیم سون ایللر «ائل بیلیمی موسسه‌سی»نده‌کی فعالیتلریله برابر «مهد تمدن» درگیسی‌نین آذربایجان تورکجه‌سینده یاییلان «سانجاق» آدلی اؤزه‌ل صحیفه‌سینده ده مسئول ایشچی کیمی چالیشیردی. ادبیاتدان علاوه، سوسن خانیم موسیقی ساحه‌سینده ده بیر نئچه ایل جدی فعالیت ائتمیش و تبریز شهرینده‌کی «سماع» آدلی موسیقی گروهونون چالیشقان عضولریندن اولموشدور.
سوسن خانیم نواده رضی‌نین ایلک شعر مجموعه‌سی «شلاله‌لر شله‌سی» آدی ایله نشر اولوب، سونرالار «تبریزیم کیمی (شعر توپلوسو و مصاحیبه‌لر)»، «اننه‌م‌نن من: سیرا ناغیل‌لار» و «مونجوق حئکایه‌لری(یئنی یئتمه‌لر اوچون حئکایه توپلوسو» کیمی اثرلری ده ایشیق اوزو گؤروبدور.
سوسن خانیم نواده رضی‌نین ایتگیسی آذربایجان ادبی جمعیتی‌نین ایتگیسی‌دیر. «ایشیق» – آذربایجان ادبیات و اینجه صنعت سایتی- امکداشلاری آدیندان بو آغیر ایتگینی قلمداشیمیزین حؤرمتلی عائله‌سینه، دوست و تانیشلارینا، ائله‌جه‌ده «ائل بیلیمی موسسه‌سی» و «مهد تمدن» درگیسی‌نین اداره هئیتی و امکداشلارینا باش ساغلیغی وئریر و آذربایجانین گؤرکملی شاعر، ژورنالیست و فولکلور تدقیقچیسی‌نین خاطیره‌سینی عزیزله‌ییریک. عشق اولسون عزیز خاطیره‌سینه.
«ایشیق» – آذربایجان ادبیات و اینجه صنعت سایتی
بیزتورک قادینلار مرکزینده بو بویوک ایتگینی بوتون تورک مدنی جمیعتنه و خالقیمیزا تسلیت دییب , سوسن خانیمین بو امانسیز گدیشینه گوره درین اوزونتو ایله هامیمیزا صبر و دوزم دیلیییریک!هله یاشاییرام/ سوسن نواده‌رضی
اومودومدا چیلله گئجه‌سی
ال‌لریم خزل سپیلیر پاییزلیغیما؛
باهارین اولارام بایرامیم اولسان
و اولدوزلوغونو سایریشارام.
هله یاشاییرام
هله اؤلمه‌میشم گومان
نمنیه
نسه‌لر اومورام نسه‌لردن هله…
بلکه ده
یاشاماق اؤلمه‌یین او بیری اوزودور؟!
اوره‌ییمده دنیزلر چاخناشماسی وار
اووجومدا بالیق‌دیر چابالیر، سئوگی.
قوینوم سیخ قوجاقلاشماغا داریخیر
دوداق‌لاریم،
سحرین گوزگوسونده، گولون گولوشو.
گؤزلرین سیررینی بیلمه‌دیم
اکدیک‌لریم جوجرمه‌میش سولدو ندنسه
باهارین اولاجاقدیم بایرامیم اولسایدین…
زامان شاشیردیجی عنصردور
انسان‌لار ایسه
آجی و سویوق دورلار.
باشیمی قارا- قارا فاجعه‌لر یاغمالاسا دا
کؤکسوم هله ده
ییرغالانیر یاشیل- یاشیل دویغولار قوینوندا.
نفس چکنده نه اولاااار؟!
بلکه ده
ایل‌لردیر اؤلموشوک…
تورک قادینلار مرکزی
۱۶ مارس ۲۰۲۳
