ترانه علیدوستی گیروو قارشیلیغیندا سربست بوراخیلیب
بوندان اؤنجه ایرانین بعضی رسمی خبر آژانسلاری خانیم علیدوستی‌نین گیروو قارشیلیغیندا سربست بوراخیلماسی ایمکانی‌نین یارادیلماسی باره‌ده بیلگی وئرمیشدیلر.
ترانه علیدوستی ۱۴۰۱-جی ایل ۱۶ آذرده ایراندا خالق اعتراضلارینی موشایعت ائتدیگی و آیریجا بو اعتراضلار زامانی حبس ائدیلن گنجلردن محسن شکاری‌نین اعدامی ایله باغلی تنقیدی یازی یاییملادیغی اوچون حبس ائدیلمیشدی.
۱۸ آبان گونو او، مجبوری حجابسیز فوتوسونو یاییملایاراق عومومی اعتراضلارا قوشولوب.
خانیم علیدوستی‌نین حبسی ایران داخیلینده و خاریجده چوخلو تپکیلره سبب اولدو و بیر چوخ دونیادا تانینمیش صنعتچیلر اونون آزادلیغا بوراخیلماسینی طلب ائتدیلر.
ایراندا اخلاق پولیسی‌نین نظارتینده اولان مهسا امینی‌نین اؤلوموندن سونرا باشلانان عومومی اعتراضلارین باشلانماسیندان بو گونه قدر موختلیف ساحه‌‌‌لردن چوخلو سایدا صنعتچی حبس ائدیلیب.
سینما ائوی ۲۳ آبان ۱۴۰۱-ده بیر راپوردا ۱۰۰ صنعتچی‌نین حبس ائدیلدیگینی و یا چیخیشینا قاداغا قویولدوغونو اعلان ائتدی.
اعتراضلاردا حبس اولونان، سونرا ایسه سربست بوراخیلان صنعتچیلر آراسیندا «شروین حاجی پور»، »کتایون ریاحی» و«هنگامه قاضیانی» ده وار.
آنجاق «توماج صالحی»، «سهیلا گلستانی»، «حمید آذرپور»، «علی شادمان» و بیر چوخ باشقا صنعتچیلر هله ده حبسده‌دیر و بعضاً آغیر اتهاملارلا اوزلشیرلر.
ایران سینما ائوی ۱ آذر ۱۴۰۱-ده بیر آچیقلامادا اؤز عضولریندن فیلم و تلویزیون پروژه‌لرینده امکداشلیقدان چکینمه‌لرینی و خالقا قارشی داوام ائدن زوراکیلیقلارا و صنعتچیلرین آردیجیل چاغیریلماسی و حبسلرینه اعتراض اولاراق تحصن ائتمه‌لرینی خواهش ائده‌جه‌یینی آچیقلادی.
#عومومی_اعتراضلار #ترانه_علیدوستی
