تورک قادینلارین “نثر” اثرلریندن اوخویالیم حکیمه بابا کیشی زاده
حکایه
محبوبه اللرینی اؤلچه_اؤلچه سکینه گیلین ائیوانیندان گؤرسنیر، سکینه داوودا دئییر؛ اورا باخ، اورا باخ!
داوود گولور دئییر؛ دده وای عسگرین وای حالینا، بللیدیر ایندی حوصله‌سی پ.. دادی وئریر. سکینه شئیطان شئیطان گولومسه‌ییب داوودا دئییر؛ نمنه دادی، اونون دادین بیلن وار یانی؟!. داوود دمپایی تایین قالخیزیب توللاییر سکینه‌یه ساری دئییر؛ من نه بیلیم، حتما دادان بیلیر داینا!، اؤیون لوله‌میز پارتلایاندا به دئمیردین اؤزون…
داوود یئریندن قالخیر؛ بو قاپی دؤین مجبوبه اولار. گه باخ ! باجاردیغین درسلردن بو مایماغا دا وئر خانیم دوکتور، بلکه عسگر ده منیم کیمی زن ذلیل اولدو، دئییب گئدیر قاپییا ساری. سکینه تای کئش باشماغینی آیاغیندا سوروتله‌یه سوروتله‌یه بیراز تئز_تئز یورویوب چاتیر داوودا، قاپییا آز قالدیقلارینا گؤره یواش دانیشیرلار محبوبه ائشیتمه‌سین دئیه؛ یاخشی گئدیرسن دای هه؟!
گل اؤپوم گئت، دئییب، قوللارین دولاییر داوودون بوینونا؛ سن زن ذلیل دئییلسن ااااائ سن منیم باشیمین تاجیسان، وار یوخومساااان، نکواریمساااانننننن دئییب همشه‌کی لحن‌ایله اوزادیر…
_گئنه نولوب؟!
_نمنه نولوب
_زهر نمنه نولوب، قیافه‌ندن زهریمار تؤکولوره، قیرخ مئتیرلیکدن بللیدیر حؤصله‌ن پ.. دادی وئریر، هله یاخشی یادیما دوشدو آی قیز او پئنجره‌زه ایکی مئتیر آغ آلدیر داینا، بلکه بیر گون میرتیوا دوشدو او ننه‌سیز عسگری اؤپدون، کتده بیر ایمام‌قولو بیلمز اوداکی کوردو، دئییب شاققاناق چالیب گولور
_مجبوبه‌نین دوداغی قاچا_ قاچا؛ سنین ده میرتین دوروبه یولداش دئیه‌سن، کئچی جان قایدیندا قصاب پییی آرزولاییر، دئییب باشین بوللاییر.
_آااااز یوخه واللاه دوز دئییرم، بایاق ائوین ایچینده ال_قولونو بئله اؤلچوردون بیز ائیواندان سنه باخیب گولوردوک. هله دئه گؤروم گئنه نولوب محبوبا خانیم!
_هئشزاد نولاجاق، منه آللاهین گونو یوخدوکو، گئنه عسگرین گ… دیل قویوبلار. فتاحین مالینین قیچی سینیب، وئریبلر قصصابا، ننه باجیسی بیزیم یاخامیزدان ال چکمیرلر کی حؤکمان داناوین بیرین وئر قارداشیوا. من ده دئییرم آی باجی، آی ننه نییه بیز دانامیزی وئره‌ک اولارا، نه حئساب کتابلا بو سؤزو دئییرسیز، نییه منیم زیندگیمدن مایا قویورسوز، او دانا عسگره دده‌سیندن قالماییبه، جانیم چیخیب بوغازیما قیفیل وورموشام، آز یئمیشم، آز گئیمیشم بیر دانانی ایکی دانا ائله‌میشم. فتاحین آروادی باشین قویوب ارینین یاسدیغینا یاتاندا منیم اریم داغلاردا چوبانلیق ائدیردی، او فهله اولوب من بننا ایندی الیمیز اؤز آغزیمیزا چاتیر، یوخسا من ده قورو قورو پوز
وئرمه‌یی باجاریردیم گؤزومو سوزدورم آغزیمی ایه ایه دئیه‌م؛ من بیر تومنه محتاج اولام قویمارام اریم گئده غربته، من تک یاتا بیلمرم، من هئله کیشینن قالمارام تای توش ایچینده اؤزگلرین مالین اوتارا…
_یاخشی، یاخشی غلط ائله‌دیم ائ گؤزده سکته وورارسان محبوبه!
_واللاه اوت دوتوب آلیشیرامه قیزا، قایننه‌مه، بالدیزیما دئیه‌ن یوخدو آی باجی، آی ننه سیزی گؤره کور گئده‌سیز، سیزین دینیزه ایمانیزا من قوسوم، فتاح ایلده بیر بایرام سیزه رحلی بزکلی پارچا آلسین دئیه اؤزوزو شیرین ساتیرسیز ساتین به منیم توفاغیمی نییه داغیدیرسیز، سیزی لال اولاسیز اینشاللاه.
_قیزا فتاح گلیب سنین داناوین باشینا ایپ سالیب ائله آپارمادیکی، دئنن وئرمیرم قوتار وسلام، اولار ها دئسین.
_یوووووخ به فتاحا دئیه‌جییم گلللللل گؤتور آپار، ننه‌سی قوربان.
_یاخشی به نییه حیرص یئییرسن بو قدر بئجاها
_قیزا ائله اولارین بئبئله اوزدو اوزدو ناحاق یئره
دانیشماقلارینا گؤره داینا، فیشاریم یوزه قالخیر دوز، تو سیزین دینیزه ایمانیزا، حجم ائله‌یه بیلمیرم ائئئئئ بونوووو.
_نه ائله‌یه بیلمیرسن؟!
_حجم، حجم ائله‌یه بیلمیرم.
_حجمممممم؟! حجم ندی محبوبا ههههههضم!!!
حکیمه باباکیشی زاده
