تهران شهر شوراسی‌نین عضوو تهران پارکلاری‌نین جینسیته گؤره آیریلماسینین حیاتا کئچیریلمه‌سینی تصدیقله‌ییب و بیلدیریب کی، شهرده ۲۰۰-دن چوخ پارک قادینلار، آنالار و اوشاقلار اوچون آیریلاجاق.
سید محمد آقامیری شنبه گونو، ۲۰ فروردینده دیدبان ایران ایله موصاحیبه‌سینده دئییب: بو پلانین حیاتا کئچیریلمه‌سی اونا گؤره‌دیر کی، آنا اؤولادی ایله نامحرم گؤزوندن اوزاقدا آسانلیقلا اوینایا بیلسین.
تهران شهر شوراسی‌نین عضوو خالقین تهرانداکی پارکلارین ارکک-قادینا چئوریلمه‌سینی طلب ائتدیگینی ادعا ائدیب و آرتیریب: بئله بیر پلانین حیاتا کئچیریلمه‌سینه سبب تهران اهالیسی‌نین طلبی‌نین یوکسک اولماسیدیر و بیز آنجاق خالقین طلبلرینی حیاتا کئچیردیک. پارکلاردا اؤزگه اینسانلار و نامحرم گنجلر وار و بو، قادینلارین مصلحتینه دئییل.
او، پروژه‌نین باشلادیغینی و حاضردا چوخلو پارکلاردا حیاتا کئچیریلدیگینی و یاخین گونلرده باشقا پارکلاردا دا حیاتا کئچیریله‌جه‌یینی تصدیقله‌ییب.
آقامیری قادینلارین گوونلیگی اوچون قادینلار و ارککلر اوچون پارکلار یاراتدیقلارینی ادعا ائده‌رک داوام ائتدی: توپلوم اعتراض ائدیردی کی، نییه گوونلی پارکیمیز یوخدور؟! اوشاقلارینی پارکلارا اویناتماغا آپاران آنالار اؤولادلاری‌نین اوغورلاناجاغی قورخوسوندان یئرلریندن قالخمیردیلار.
اوشاغی اولمایان سوبای قادینلار گیره بیلرمی سؤالینا شهر شوراسی‌نین عضوو بئله جاواب وئردی: تک اولان قادین دا گیره بیلر.
