روسیه‌نین اوکراین اؤلکه‌سینه تجاوز حمله‌سیندن نه درسلر آلماق اولار؟!
پوتین‌نین اوکراین ترکیبینده اولان«دونتسک» و «لوهانسک» ایالتلریندن حمایه ائتمه‌لرینه بلکه بیر عده اینانا بیلردی، چونکو بو ایکی ایالتین چوخونلوقلا روس دیللی اولدوغونو ولی دیل آزادلیغیندان محروم قالدیقلارینی روسیه ادعا ائدیردی.
بو ادعانین نه قدر دوغرو اولدوغونو و بو ادعا اساسیندا روسیه‌نین بو ایکی ایالتی مستقل اؤلکه کیمی تانیماسینی آراشدیرماق لازیمدیر، آمما بو ایالتلرین اؤزگور اؤلکه کیمی تانینماسیندان یالنیز اوچ گون سونرا، روسیه بوتون اوردو قوّه‌لری ایله اوچ طرفدن اوکراین اؤلکه‌سینین مرکزینه حمله ائتمه‌یه باشلادی، بیر حالدا کی، نئچه گون قاباق دئمیشدی: «بیزیم اوکراین اؤلکه‌سینه حمله ائتمک مقصدیمیز یوخدور!» آمما اولمایانلار اولدو!
بو دورومدا سوپر گوج #آمریکا و زنگین #آروپا اؤلکه‌لری بو ویدئونو گؤروب اوتانمالیدیرلار! بوندان سونرا کیم بو اؤلکه لرین «#انسان_حاقلاری» و اؤزگور اؤلکه‌لردن مدافعه ائتمک شعارلارینا اینانا بیلر؟
حسن راشدی
