یول پولیسی رئیسی: موتورسیکلت سورن قادینلارا کسینلیکله قارشیلیق وئریله‌جک
یول پولیسی رئیسی کمال هادیان‌فر، قادینلارین موتورسیکلت سورمه ایجازه‌سینه مالیک اولمادیقلاری اوچون موتورسیکلت سورمه‌لری‌نین قانون پوزونتوسو اولدوغونو و سورنلره کسینلیکله قارشیلیق وئریله‌جه‌یینی دئدی.
۲۷ مهر ۱۴۰۰-جو ایل چارشنبه گونو هادیان‌فر ایران مئدیاسینا وئردیگی آچیقلامادا بونون موتورسیکلت تصدیق‌نامه‌سینده یالنیز ارککلرین آدلاری‌نین چکیلمه‌سی‌نین و بو سببدن قادینلارا موتورسیکلت ایجازه‌سی‌نین وئریلمه‌مه‌سی‌نین سبب اولدوغونو سؤیله‌دی.
او آیریجا دئدی: “بو مسئله اوچون قانوندا ديیشیکلیک ائدیلمه‌لیدیر و یول پولیسی بونونلا باغلی تدبیر گؤره بیلمز“.
سون ایللرده ایرانین هر یئریندن موتورسیکلتچی قادینلارین ساخلانیلدیغی باره‌ده خبرلر یاییلیب.
۱۳۹۶–جی ایلده ایکی قادین دزفول شهرینده و بو ایلین مرداد آییندا مشهدده موتورسیکلت ایله چالیشان بیر قادین حبس ائدیلدی.
حبس خبرلری یاییلدیقجا، یول پولیسی مامورلاری موتورسیکلت تصدیق‌نامه‌سی اولان هر کسین موتورسیکلت سوره بیله‌جه‌یینی و قادینلارین تصدیق‌نامه آلا بیلمه‌دیکلری اوچون موتورسیکلت سوره بیلمه‌یه‌جکلرینی سؤیله‌یه‌رک قاداغانین مسوولیتینی داشیمادیقلارینی بیلدیردی.
بونونلا بیرلیکده، ۱۳۹۵-جی ایلده ایسلام جمهورییتی‌نین لیدری اولان علی خامنه‌ای‌نین اوفیسی “فارس” خبر آژانسی‌نین قادین موتورسیکلت سورنلر ایله باغلی سورغوسونا جاواب اولاراق دئمیشدی: “قادینلارین توپلومدا و نامحرملرین یانیندا موتورسیکلت سورمه‌سی، ارککلرین دقتینی چکیر و توپلومدا فیتنه-فسادا یول آچیر و قادینلارین عیفتینه ضدیر و سورمه‌مه‌لری لازیمدیر. آنجاق نامحرملردن اوزاق یئرلرده هئچ بیر پروبلئم یوخدور. “
iranwire
