بیر قروپ تجاووزجونون سردشتده قادینلارا تجاووزو خبریندن سونرا بو شهرده اعتراض میتینقی کئچیریلدی
ایران وایر- ۳ مهر ۱۴۰۰-جو ایل شنبه گونو آخشام، بیر چوخ مدنی فعال و سردشتلی وطنداش بو شهرده بیر نئچه قادینا تجاووز ائدن بیر قروپ تجاووزویه قارشی اعتراض میتینقی کئچیردیلر.
هنگاو وب سایتی‌نین یازدیغینا گؤره، وطنداشلار قروپون شهرده بیر چوخ قادینا تجاووز ائتمه‌سینیه اعتراض اوچون سردشتین فلکه سرچشمه مئیدانینا توپلاشاراق قوربانلارا و عائله‌‌‌لرینه باش‌ساغلیغی و دستکلرینی ایفاده ائدیبلر.
بو اعتراض میتینقی ساوجی‌نین تهدیدلرینه باخمایاراق باش وئریب، لاکین سردشت ساوجیسی ولی خداکرمی دئییب: “ایستر سانال اورتامدا، ایسترسه ده قانونسوز توپلانتیلار واسطه‌‌‌سیله شهرین اجتماعی مکانینی و گوونلیگینی پوزماق ایسته‌ینلری دوشمن نفعینه اویناماماقدا دقتلی اولمالاری اوچون خبردار ائدیرم.”
کردپا سایتی، پولیسین اعتراضچیلارا قوشولماق ایسته‌ین بیر قروپ آدامی تهدید ائتدیگینی ده خبر وئردی.
کئچن هفته سردشتده‌کی بیر سیرا مدنی فعاللار قادین حوقوقلاری ساحه‌‌‌سینده فعال اولان بیر نئچه اینستاگرام صفحه‌‌‌سی ایله بیرلیکده شهرده قادین و قیزلارین بیر دسته‌نین تجاووزونا معروض قالدیغینی بیلدیردی.
بیر نئچه تجاووزکارین آدلارینی و شکیللرینی ده آچیقلادیلار و بعضی قادینلار “بیر نئچه ایل اؤنجه باجیسینی دا اؤلدورن” دسته عضوو طرفیندن تجاووز ائدیلدیکلرینی تصدیق ائتدیلر.
بو خبرلر درج ائدیلدیکدن سونرا اینسان حوقوقلاری تشکیلاتی مهر آیینین ایلک جوما آخشامی گونو سحر ساعتلاریندا بیر نئچه نفرین قادین حوقوقلاری ساوونوجوس ناسکه افخمی‌نین آتاسی ائوینه ال پارتلاییجیسی ایله هوجوم ائده‌رک بؤیوک میقداردا ائوه زیان ووردوقلارینی بیلدیردی.
ناسکه افخمی، سوییس ده یاشایان قادین حوقوقلاری و گؤی قورشاغی جمعيتی ساحه‌‌‌سینده چالیشان ۳۹ یاشیندا بیر فعالدیر.
