نرگس محمدی یئنیدن حبس و شاللاق جزاسینا محکوم ائدیلدی
اینسان حوقوقلاری ساوونوجولاری درنگی‌نین باشقان یاردیمچیسی نرگس محمدی، ۳۰ آی حبس، ۸۰ شاللاق و ایکی فرقلی جریمه جزاسی اؤده‌مه‌یه محکوم ائدیلدی.
سورگونده اولان سیاسی فعال و خانیم محمدی‌نین حیات یولداشی تقی رحمانی بو خبری ۲ خرداد بازار گونو اینستاگرامدا یایدی.
خانیم محمدی بو یئنی پرونده‌ده بیر آچیقلاما (اعدام حؤکمونه قارشی آچیقلاما) یایماق یولو ایله ایران ایسلام جمهوریییتینه قارشی تبلیغات آپارماق، حبس‌خانا اوفیسینده آکسییا کئچیرمک (۱۳۹۸-جی ایلین دی آییندا اؤلکه داخیلینده‌کی کوچه‌لرده باش وئرن قیرغی‌نینا اعتراض اولاراق کئچیردیگی آکسییا) و حبس‌خانا رئیسی و مقاملارینا قارشی چیخماق (اعتراض آکسییاسینی بیتیرمک اوچون) و شوشه‌لرین قیریلماسی و ایشگنجه و دؤیولمه و شدت گؤرمه‌سینه دایر آتدیغی بؤهتان اتهاملاری ایله گوناهلاندیریلیر.
نرگس محمدی، تانینمیش بیر اینسان حاقلاری فعالی و اینسان حاقلاری ساوونوجولاری درنگی‌نین باشقان یاردیمجی‌سی‌دیر کی فعالییتلری نه‌دنی ایله اوزون ایللر ایران حبس‌خانالاریندا حبس اولوب.
محمدی ایلک دفعه ۱۳۹۸-جی ایلین اردیبهشت‌ینده توتولدو و ۱۱ ایل حبس جزاسینا محکوم ائدیلدی. تمییز محکمه‌‌سی بو جزانی آلتی ایله ائندیردی. سوروشدورما و حبس مودتینده روحی خسته‌لیکلره عضله فلجینه مبتلا اولدو و ۱۳۹۱-جی ایلین یاییندا خسته‌خانایا گؤندریلدیکدن و حکیملر حبس‌خانایا دؤزومسوزلویونو بیلدیردیکدن سونرا سربست بوراخیلدی.
اینسان حاقلاری ساوونوجولاری درنگی‌نین باشقان یاردیمچیسی ۱۳۹۴-جو ایلین اردیبهشت آییندا یئنیدن حبس اولوندو. او قاضی «ابوالقاسم صلواتی»نین باشقانلیغی ایله محکمه‌‌ده، «میللی گوونلیگه قارشی جنایت تؤرتمک اوچون توپلاشما و ال بیر اولماق» اتهامی ایله بئش ایل حبسه، «رژیمه قارشی تبلیغات فعالیتی» اتهامی ایله بیر ایل حبس و “لگام آدلی قانونسوز قروپو قورماسی و ایداره‌سی» اتهامی ایله ده ۱۰ ایل حبس جزاسینا محکوم ائدیلدی.
نرگس محمدی، ۵ ایل حبس‌خانادا قالدیقدان سونرا نهایت کئچن ایل ۱۷ مهر تاریخینده حبسدن چیخدی و اینسان حاقلاری فعالیتینه آرا وئرمه‌دن داوام ائتدی.
iranwire
