صبا کرد افشاری: ایسلام جمهوریتی اوچون اینسان حیاتینین هئچ بیر دیری یوخدور
ورامینده‌کی قرچک حبس‌خاناسیندا حبسده اولان سیاسی محبوس و ۱۸ اردیبهشت شنبه گونوندن بری آجلیق آکسییاسی کئچیرن صبا کرد افشاری، بیر مکتوب گؤندره‌رک آجلیق آکسییاسی‌نین سونا چاتدیغینی آچیقلادی.
سیاسی محبوس هرانانین یاییملادیغی بیر مکتوبدا بئله یازیب: “۱۸ اردیبهشت ۱۴۰۰-ده سیاسی محبوس عائله‌‌‌لرینه ائدیلن تضییقلره سون قویماق و آنام راحله احمدی‌نین سربست بوراخیلماسینی طلب ائتمک اوچون آجلیق آکسییاسی کئچیردیم آما تأسف کی، فیزیکی وضعيتیم یاخشی دئییل. اینسان حیاتینین ایسلام جمهوریییتی اوچون هئچ بیر ديَری اولمادیغی‌نین تام فرقینده‌یم، بونا گؤره آجلیق آکسییامی دایاندیرمالی اولاجاغام.”
کرد افشاری، آجلیق آکسییاسی‌نین بیتمه‌سینه باخمایاراق، هله ده سیاسی محبوس عائله‌‌‌لرینه تضییق طلبلرینی یئرینه یئتیرمه‌یه چالیشدیغینی وورغولادی.
صبا کرد افشاری مکتوبوندا یازدی: “ایللردیر اعتراض و آکسییالارین جاوابی دؤیولمه و گولـله اولوب. ایللردیر آغزیمیزی آچیب مظلوملارین حوقوق و اینانجلاریندان دانیشاندا، گؤز آلتی، تکاداملیق حبس، ذهنی و فیزیکی ایشگنجه، حبس و اعدامدان باشقا بیر جاواب آلمادیق.”
او ایسلام جمهوریییتی‌نین گوونلیک قوروملاری‌نین موخالیفتی سوسدورماق اوچون یاییلمیش تضییقلرینه توخوناراق، بونلاری وورغولادی: “اونلار” پاسلی کیچیک بِیینلرینده اولانی بیزه اؤتوره بیلمه‌دیلر و هئچ واخت اؤتوره‌مه‌یه‌جکلر. اؤزلری‌نین ده اینانمادیقلاری فیکیرلری باشقالارینا دیکته ائده بیلمزلر.”
صبا کردافشاری ۹۸-جی ایلین خردادیندا تهراندا حبس اولونان “آغ چارشنبه‌لر” کامپانییاسی‌نین فعاللاریندان بیری ایدی.
بیر مدت سونرا تهران اینقیلاب محکمه‌‌سی‌نین ۲۶ سایلی شؤبه‌سی بو مدنی فعالی “فساد و فاحیشه‌‌‌لیگی تشویق ائتمک” اتهامی ایله ۱۵ ایل، “میلی گوونلیگه قارشی حرکت ائتمک آماجی ایله توپلاشماق و ال بیر اولماق ” اتهامی ایله ۷ ایل یاریم و “رژیمه قارشی تبلیغات” اتهامی ایله بیر ایل یاریم حبس جزاسینا محکوم ائتدی.
کئچن ایلین آبان آییندا عالی محکمه‌‌نین ۲۸ سایلی شؤبه‌سی، خانیم کردافشاری‌نین وکیللری‌نین اونون یئنیدن موحاکیمه اولونماسینا دایر طلبینی رد ائتدی.
صبا کردافشاری ۱۶ تیر ۱۳۷۷-جی ایلده آنادان اولوب.
iranwire
