نوال سعداوی، مصیرلی طبیب و اؤنجول یازار فمنیست خانیم، سوسیال فعال خانیم 89 -یاشیندا دونیاسینی دییشدی
وال سعدی 1931- اینجی ایلده قاهره‌نین یاخینلیغیندا بیر کندده دونیایا گؤز آچدی. او 9 باش عائله‌نین ایکینجی اوشاغیدی.آتاسی دئولت ایشچیسی، آناسی ایسه بیر وارلی عائله‌دن‌ایدی.
او 1955- ده طیب بؤلومونده قاهره یونیورسته‌سیندن ماذون اولدو، سونرالار پسیکولوژِی اوزمانی کیمی ایشه باشلادی.
بیر آرا مصرین عومومی ساغلاملیق رئیسی اولدو. آنجاق 1972-ده قادینلارین ختنه و جینسی زوراکیلیغی‌نین علیهینه یازدیغی” قادین و جینس” کیتابی یایلاندان سونرا ایشدن آتیلدی.
او ایلک رومانی نی 13 یاشیندا یازدی. عائله سی اونو اون یاشیندا اره وئرمک ایستییرمیش آنجاق او آناسی نین حمایه‌سیله دایانیب و بو ایشه یوخ دئییر. سعداوی یازیر:
آتا- آناسی اونو تحصیله تشویق ائدیکلرینه رغما اوشاقلیق چاغیندان قیزلارین ده‌یرسیز اولدوقلارینی آنلامیشدیر.او دئمیشدی، بؤیوک آناسی اونا دئینده کی، بیر اوغلان أن آزی اون بئش قیزا دهیر، حیرصیندن آیاقلارینی یئره چیرپمیشدی.
سعداوی نین آجی خاطیره لریندن بیری، آلتی یاشیندا ختنه اولماغیدی. ” حوانین گیزلی اوزو “کتابیندا آناسینین یانیندا حامامدا، بو ایشین قورخلو و عذابلی اولدوغونو وصف ائدیبدیر. او عؤمور بویو قادینلارین ختنه اولماغین قارشیسیندا دایانیب، دئییردی قادینلارین ختنه سی قادینلارا بؤیوک ظولمدور.
باخمایاراق 2008- ده قادینلاری ختنه ائتمک مصرده یاساقلاندی، آنجاق او یئنه موباریزه سینه دوام وئردی.
یازماق و دیرلی چالیشمالارین دوامیندا 1975-ده ” صیفیر نوقطادا بیر قادین” رومانینی نشر ائتدی. بو رومان اعدامینی گؤزلوین بیر قادینین گئرچک حیکایه سیدیر.
1977-ده “حووانین گیزلی اوزو” کیتابینی یازدی. بو کیتابدا، او بیر کتده طبیب کیمی چالیشان سیمتینده کئچیردیگی تجروبه‌لرینی، ناموس آدیندا قتل لرو فحشا حاققیندا یازدی. بو کیتاب چوخلاری نین خشمینه ندن اولدو.
1981- اینجی ایلین سپتامبر آیندا ، انور سادات زامانی، توتولوب اوچ آی زینداندا قالدی. زینداندا قاش میدادییلا توالت کاغاذین اوستونده خاطیره لرینی یازدی.
انور ساداتین تروروندان سونرا او آزاد اولدو، آنجاق اثرلری سانسور اولوب، کیتابلاری یاساقلاندی. نهایت آمیریکا یا گئتمک زوروندا قالدی. اوردا دین، باتی لیلارین سومورچولوق و ایکی اوزلولوقلاری علیهینه موباریزه سینه داوام ائتدی. حیجابا قارشی یازدی، هابئله قادینلارین آچیق گئیملری و بزکلری حاقدا اعتراضینی بیلدیردی کی، بو اعتراض فمنیستلره خوش گلمدی.
او دونیانین موختلیف دانیشگاهلاریندان ایفتخاری مدرکلرو اؤدول لر آلدی. 2020- ده تایم درگیسی اونو 100 موفق قادین سیراسیندا یئرلشدیردی.
نوال سعدی 1996- دا میصره قایدیب و چوخ تئز های کوی سالدی. 2004-ده پریزیدنت سئچگیلرینه آدای اولدو. 2011- ده قاهره نین تحریر میدانیندا حوسنی موبارکین علیهینه قیامدا حاضیریدی.
عؤمرونون سون ایللرینی قاهره ده اوغلویلا قیزینین یانیندا اولدو. مارتین 21( فروردی نین بیرینده) میصر گوندلیکلری اونون اؤلوم خبرینی یایان زامان، فیسبوک صحیفه‌سینده ساده بیر مساژ یازیلدی” نوال سعدی… الوداع”
منبع:
بی بی سی
ذکیه ذولفقاری
