ایرانلی قادینلار نهایت جینسی تجاووزه قارشی سس‌سیزلیکلرینی پوزدولار
واشنگتن پست
یازارلار: مسیح علی‌نژاد و رویا حکاکیان
ترجومه: الناز سربر
سون 42 ایلده ایرانین روحانی لیدرلری، مجبوری حجابین ارککلرین جینسی تجاووزونه قارشی قادینلار اوچون ان یاخشی مودافیه اولدوغونو ادعا ائده‌رک رژیمین سرت ایسلام گئییم کودونو مودافیه ائتدیلر. لاکین سون بیر نئچه هفته عرضینده ایرانلی قادینلار ایش وئرنلرینین و ایش یولداشلارینی، حتی بیر سیرا یوکسک وظیفه‌‌‌لی مامورلاری جینسی جینایتلر و تجاووزلا ایفشا ائتمک و اتهام ائتمکله بو ادعانی رد ائتدیلر.
تقصیرلندیریلن اینقیلاب کئشیکچیلری کوماندیرلریندن توتموش مشهور صنعتچیلره و عادی وطنداشلارا قدر اولان موتهیملر کاتولیک کیلسه‌سیندن فرقلی اولمایان بیر رژیمین درین و سیستماتیک بیر اخلاقی بؤحرانینی عکس ائتدیریر. اؤزونو دوزلویون و اوستون فضیلتین کئشیگینده گؤرن دؤولت، و کسکین تنقید ائتدیگی باتی توپلوملاریندان داها یاخشی اولمادیغینی بلکه داها دا پیس اولدوغونو گؤستردی.
ایرانلی قادینلارین سؤیله‌دیکلری «هاروی واینستین» و «بیل کازبی» قوربانلارینی خاتیرلادیر. ایران مئدیاسی‌نین کئچمیش موخبیری «سارا امت‌علی»، سون زامانلار گئنیش یاییلمیش توییتلری آچاراق 14 ایللیک بیر سسسیزلیگی پوزان سون ادعاچیلاردان بیریدیر کی باشقالارینا اونون نومونه اولاراق ایزله‌مه‌لری اوچون بیر قاپی آچدی.
موصاحیبه آپاردیغی «آیدین آغداشلو» ایله گؤروشونو تصویر ائتدی و مشهور صنعتچی‌نین سرگیده گؤروشمک عوضینه اوفیسینده گؤروشمک اوچون ایصرار ائتدیگینی یازدی. سارا ایچری گیرنده او چیلپاقدی و یالنیز بیر اؤرتو گئیینمیشدی، سونرا سارانی زورلا قوجاقلاییر و اونو اؤپمه‌یه چالیشیر. سارا اونو اؤزوندن اوزاقلاشدیراراق حادثه یئریندن قاچیر.
سارا یازیر «ایللرله اؤزومو گوناهکار، اوتانج وئریجی و عذابلی حیس ائتدیم» . داها احتیاطلی اولمالییدیم و دقتسیز بیر قادین اولدوغومو دوشوندوم. اؤزومو گوناهلاندیریردیم! آنجاق «Me too» حرکاتی حاقیندا نه قدر چوخ اوخوسام، جینسی تجاووزدن خلاص اولانلار اوچون بو حیسلرین نورمال اولدوغونو باشا دوشدوم.»
سارانین آچیقلامالاریندان اؤنجه نامعلوم قادینلار چوخ دهشتلی تجروبه‌لری حاقیندا یازمیشدیلار، آما امت‌علی‌نی قاباقا آتان شئی، اونون خالق قارشیسیندا چیخیش ائتمک ایستیی ایدی. گوجلو بیر تجاووزکارین و قادینلارین تئزتئز تجاووزه معروض قالدیقلاری بیر کولتور کی اوندا قادینلار اوز اوزه قالدیقلاری تجاووزدان اؤتورو گوناهکار تانینیردیلار کی اؤزلری اوندان اذيت چکمیشلر.
ایندی ایراندان کناردا یاشایان امت‌علی، سانسور سوز عومومی مئدیایا الی چاتیر. ایسلام جمهوریییتی‌نین چوخ سرت شرطلری ایله اوزلشمه‌سینه باخمایاراق، اوندان اؤنجه‌دن ایفشا ائدنلرین جسارتیندن ایستیفاده ائتدی. اؤلکه داخیلینده‌کی دیگر بیر چوخ ژورنالیست ده اوخشار سو ایستیفاده‌لر باره‌ده معلومات وئردی.
دؤرد ایل اؤنجه، ایران ایسلام جمهوریییتی رادیو و تلویزیونونون خاریجی کانالی اولان پرس تی‌وی‌نین آپاریجیسی «شینا شیرانی»، مودورلریندن بیری‌نین اونو ایش اوتاغیندا حبس ائتدیگی بیر حادثه باره‌ده خبر وئرمیشدی. لاکین شیرانی بو ایفشادا ائتدیگی سس-کویده تک قالدی.
کئچن ایل باشقا بیر بدنام بیر ایشده، اینقیلاب کئشیکچیلری‌نین کئچمیش عضوو و ایسلام مشورت مجلیسی‌نین بئش دؤورونون عضوو سلمان خدادادی، ایش یئرینده ایش تاپماغا اومید ائدن سئچیجیلریندن اولان «زهرا نویدپور»، آدلی بیر قادین وطنداش طرفیندن محکمه‌‌یه وئریله‌رک تجاووز اتهامی ایله محکوم ائدیلدی. نویدپور اتهامین تفروعاتلارینی آچیقلادیقدا، خدادادی اونو و عائله‌‌‌سینی اؤلدورمکله تهدید ائتدی. گنج قادین تهدیدلره باخمایاراق دانیشماغا داوام ائتدی، آما نتیجه‌ده جسدی تاپیلدی. گؤرونن او کی اؤلومون سببی «اینتیهار» ایدی. تجاووزکار چوخ قیسا بیر مدتی حبس‌خانادا کئچیردی و تئز عفو ائدیلدی و سربست بوراخیلدی.
بو و بونا بنزر حاللار هئچ بیر قورونما و باغیشلانما اولمایان قادین دوشمانلیغی‌نین درجه‌‌‌سینی اورتایا قویور.
بو ایفشا ائتمه‌لرین اورتاسیندا عادی قادینلارین ایللردیر کوچه‌لرده آنونیم تجاووزکارلارلا کئچیردیکلری گونده‌لیک موباحیثه‌لر اهميتلیدیر. معلوم اولوب کی، جینسی تجاووزدن ان یاخشی قورونما موبایلدیر. پوپولر هشتگ اولان «دوربین من، اسلحه من» (کامئرام، منیم سلاحیم)، بیر چوخ قادینا تجاووزکارلارا قارشی صحیفه آچماق اوچون گوج قازاندیردی. چونکی چکیلدیکلرینی بیلنده حادثه یئریندن قاچیرلار. بو قادینلار گوناهکارلاری ایفشا ائده‌رک رژیم علئیهینه دانیشیرلار. اونلارین ادعالاری، ارککلرین گوجسوز وارلیق اولدوقلارینی و قادینلار چادیر آلتیندا گیزلنمه‌دیکلری تقدیرده داورانیشلارینا گؤره مسوولیت داشیمادیقلارینی اینکار ائدیر.
شوبهه‌سیز کی، باشلارینا گلنی ایفشا ائتمه‌یه جسارت تاپان بیر سیرا قادینلار باتی‌داکی «منده»، حرکاتی‌نین تأثیری آلتینا دوشدولر. لاکین بو حاللارین هر بیری‌نین جمعی قوه‌سی‌نین نتیجه‌سی فردی قوه‌لرین توپلامیندان چوخدور؛ بو قادینلارین ایلک نؤوبه‌‌ده اؤیرندیکلری بودور کی، حجاب اونلاری ظالیملارا قارشی مودافیه ائده بیلمه‌ین بیر بئز پارچاسیدیر. اونلاری جینسی تجاووزدن حقیقتاً قورویا بیله‌جک شئی قانونون اوستونلوگو و هئچ کیمین قانوندان اوستون اولمایان بیر توپلومدور.
ایرانداکی مؤوجود دالغا اوچون جندر برابرلیگینی قورماغی هدفله‌ین باتی اؤلکلرینده‌کی مؤوجود حرکتله موقایسه‌‌ده جندر برابرسیزلیگی اساس مسئله دئییل، داها جدّی بیر فاجعه‌‌‌نین علامتلری‌نین بیر حیصّه‌‌‌سیدیر؛ رئژیمین اؤزو.
